公民黨成員兼浸會大學政治及國際關係學系副教授陳家洛，噚日同港大法律系副教授戴耀廷，一齊喺外國記者協會主講，就「香港自由正受威脅？2018年學者與媒體的挑戰」為題發表演講。噚日咁啱係家洛生日，佢四位千金中，一對孖女Maja同Kaja同太太都有出席，聽家洛演講。不經不覺，家洛呢對孖女已經亭亭玉立，十分靚女。
家洛話，孖女對佢同Benny主講嘅題目都有興趣，所以出席。家洛喺演講時話，今時今日做大學學者爭取民主、人權和社會進步，變得越來越困難，大學因為成日要四出籌錢，唔敢得罪權貴，呢啲同北京友好嘅權貴，不滿大學啲教員製造麻煩，搞到啲年輕人成日走出來抗爭，最終威脅停止捐錢畀大學，令大學管理層受壓跪低。