人稱「球場莫札特」嘅路斯基，上年12月因傷宣佈掛靴，上星期六就舉行咗佢嘅紀念賽，由佢國家隊隊友，包括真高拿、巴路士、普波斯基，組成嘅R10捷克隊，鬥由尹佩斯、法比加斯、紐尼沙軒等前球會隊友組成嘅R10世界隊。至於喺國家隊同球會都係隊友嘅施治，就同路斯基本人一樣兩隊都踢晒。
路斯基上半場先代表R10世界隊，但R10捷克隊有真高拿梅開二度，半場領先有艾華頓入波嘅世界隊。換邊後，尹佩斯幫世界隊追成2:2，不過下半場改踢捷克隊嘅路斯基射入12碼，再加上巴路士同普波斯基各入一球，最終R10捷克隊以5:2贏波。賽後大家都好開心咁為路斯基慶祝，可以見番咁多老朋友，其實戰果係點又有咩所謂喎。