Tommy仔貝湯美冇申請下季公司騎師牌照，今季佢喺香港唔太順利，好多時只能騎下風馬，但今期(10日)沙田第五場四班草地1200米，竟然執到支好籌，出策姚本輝馬房實力分子「雷電寶」，而呢個配搭有段故。
3歲的「雷電寶」之前服役兩戰均由沈拿騎，其中上場一加眼罩立即變身，喺直路賽有前有後殺入季軍，令人眼前一亮。
不過，沈拿今場竟騎近績一般嘅「旅英公爵」，令人摸不着頭腦。原來姚本輝今場最初只報一匹「小鳥敖翔」，但由於呢場唔夠正選馬，延遲截止報名期間，姚本輝決定畀「雷電寶」加入戰團，打算搵沈拿壓陣之際，先知沈拿已接受霍利時邀請騎「旅英公爵」，沈拿嘆晒氣無奈把「雷電寶」讓予Tommy仔。
「雷電寶」戴眼罩係沈拿意見，佢早知此駒質素極佳，而Tommy仔日前過檔親操後，亦對「雷電寶」評價甚高，認為隻馬既有實力亦有佳態，今次初跑轉彎賽抽到有利嘅1檔，對發揮大有幫助，沈拿隨時眼白白睇住這匹舊愛勝出。