阿根廷翼鋒蘭仙尼上禮拜五操練時整傷右膝，前十字韌帶重創，教練森柏奧利噚日就宣佈補選效力河床嘅中場安素佩雷斯入伍，32歲嘅安素佩雷斯司職防中，曾經效力賓菲加同華倫西亞，代表過阿根廷上陣23次，都有踢過2014年世界盃，仲喺迪馬利亞八強受傷後，四強同決賽佢都正選登場。喺阿根廷陣中，有馬斯真蘭奴、碧基亞同班尼加三個可以踢防中嘅球員，而其中效力西維爾嘅班尼加啱啱傷癒復出，狀態成疑，喺11個初選名單有份嘅阿根廷兵入面，森帥就寧願揀多個經驗豐富嘅中場中路球員，都唔再喺前場添兵喇，所以國際米蘭前鋒莫路伊卡迪、羅馬翼鋒柏洛迪都無緣重返阿根廷大軍。