女星素顏look點擊高多人睇，唔多唔少都多得PS執相軟件同「美肌」apps，令佢哋唔怕happy share，不過呢類「零瑕疵」、「完美得可怕」嘅呃like post，可信性就留畀大家判斷，一睇見人前人後兩個樣就知發生乜事啦。
素顏呢個鬥靚遊戲最近就玩到去護膚品牌到，好似SKII最近嘅神仙水#我行我素活動，就玩顛覆，要大家接受「真」素顏challenge，品牌搵咗新代言嘅「紫天椒」美國女星Chloe Grace Moretz、《海女》日本女星松岡茉優同金像影后春夏，加埋近年代言嘅內地女星湯唯、倪妮同日本女星有村架純，六位女星齊鬥騷靚皮膚，個個唔怕真面目示人，都有佢哋嘅明星護膚秘技。
所有參加挑戰嘅女星，唔止素顏、無底妝之下影廣告相，品牌仲搵咗以「體驗式紀實攝影」手法嘅Magnum Photos團隊操刀，團體中嘅Christopher Anderson之前影過美國前總統奧巴馬揚名。除咗呢6粒女星，香港嘅謝安琪都有加入玩呢個素顏遊戲，就喺facebook貼咗一張相，話自己素顏都有自信。
喺鏡頭之下，無論由38歲做咗人母嘅湯唯到25歲嘅有村架純都好大膽，堅無底妝，素顏示人，提多一句，仲要係無執相、無玩filter，絕對係鏡頭之下見「真章」。
精選娛聞，喺晒《娛果》
http://fb.com/appledailyent