黃貫中（Paul）、夏韶聲、單立文（豹哥）、鄧建明（Joey）和恭碩良前晚在紅館舉行首場「搖滾大俠奏」band騷，明日是Beyond主音黃家駒的56歲冥壽，雖然他已離世25年，不過大家依然記掛他，隊友阿Paul和豹哥分別在台上憶故友。
阿Paul唱完《灰色軌跡》之後說：「好朋友生日快樂，我唔會忘記你，一切在心中。」接着豹哥在演出後，亦說：「93年家駒離開咗，喺跟住嗰年我聽B記啲歌，唔知點解都會喊！」說畢豹哥一度痛哭流淚，阿Paul接着說：「我哋總會有相見嘅一日，佢嘅音樂係會流傳。」豹哥就叫全場觀眾向家駒講happy birthday，場面感人。
恭碩良冧憶蓮
在五位演出的band友當中，恭碩良的年資是最淺的一個，他即場向四人致敬，豹哥笑稱自己有很多黑歷史，不過恭碩良一於懶理並說：「我喺澳門長大，嗰陣嘅資訊冇𠵱家咁發達，有啲戲院播特別電影，我要儲錢先可以去睇。點知30年後，喺街撞到個人熟口熟面，於是乎咪問佢係咪拍乜乜蒲。」豹哥笑笑口說：「係《喜愛夜蒲》，嗰陣我創立床上武術指導，自從我從影之後，創造呢個職位，大家應該要多謝我。」在另一個環節上，豹哥代fans向恭碩良發問：「鍾意農曆年抑或林憶蓮？」恭碩良說：「我鍾意農曆年同林憶蓮一齊過！」獲全場拍掌。
豹嫂透視撐夫
表演嘉賓方面，今次找來葉世榮和胡蓓蔚（豹嫂）上台，身穿透視長裙的豹嫂與老公合唱《下雨天》，直言討厭聽到自己歌聲的豹哥說：「同老婆合唱，係人生苦難幾分鐘，不過緣份奇妙，我呢啲人都有人愛，真係奇蹟！」
採訪：盧妹
攝影：沈健程
