【本報訊】醫病無故變受傷，Rabbie的事件令不少狗主引起求醫恐慌，有獸醫建議狗主選擇動物醫院時，除醫生資歷外，同需留意診所提供的設施及配套；另有律師表示，如發現個案屬實，狗主可循民事索償，惟必須在狗隻康復前，向獨立專家索取評估報告，以助追討。
獸醫黃祉峯建議，一旦狗主求診時，當發現診所會使用電熱氈為動物保暖就要留心，「其實外國好多案例已經反映唔應該用電熱氈，因為好多狗隻灼傷嘅危險案例，曾經有一隻狗甚至無咗層皮」。「（電熱氈）熱力不變，又唔散熱，其實好危險，相反而家好多會改用毛巾包住暖水袋，保暖之餘，亦不會令動物受傷。」
而主人帶寵物求醫時，黃祉峯稱，應留意動物醫院的配套，包括探病時間是否足夠，「同埋可以問清楚診所每日餵咗咩藥，做咗咩治療，清楚所有細節避免出現不必要嘅問題」 。
大律師陸偉雄指，即使屬於寵物的醫療個案，一旦發現診所涉及有關醫療失誤、欠妥善等責任，狗主均可循法律途徑以民事索償，但提醒狗主要掌握充分證據。首先建議狗主要尋求獨立的獸醫專家的協助，由專家分析及鑑定犬隻的傷勢因由，但陸大狀提醒，報告必須在犬隻康復前作評估，「唔好急住醫返好，最好評估完先去醫」 。 此外如求診時，狗主有朋友陪同見證經過，亦是有力的人證之一。