打尖唔啱，不過打交一樣唔啱！6月7日星期四下晝5點幾放工時間，港鐵例必逼爆人，有唔少打工仔喺油麻地港鐵站月台上落車嗰時，就見到月台地下有一大堆紙巾同鮮血，都咪話唔驚，原來有人懷疑打尖俾人喝止，兩個男人大打出手。
目擊事件嘅乘客蕭先生話，一位戴眼鏡着白色恤衫嘅光頭阿叔喺月台等升降機；嗰陣有位着白色Polo恤嘅後生仔一支箭衝埋去唔排隊，阿叔即刻拉番佢出嚟要佢排隊，後生仔一聲唔出就郁手打阿叔，「打到佢爆晒缸！」
另一名乘客韓先生見到阿叔左眼角流晒血，件恤衫都染滿鮮血，阿叔不停鬧個後生仔：「狼到你咁樣，我殺人呀而家，我叫你排隊咋喎，你唔排，咁樣打人！」
港鐵職員趕到了解，但阿叔同後生仔仲喺度互罵，對話大致係咁嘅：
阿叔：「冇打架，係打人！」
後生仔：「我良民嚟㗎！」
阿叔：「打人仲叫良民？」
後生仔：「良民唔可以打你呀？你樣衰鬧事！」
阿叔：「嗱，佢話打㗎，個個聽到㗎！」
後生仔：「咁點啫，我做得出怕乜認啫！」
光頭叔：「你死梗呀你，你一定坐監！」
職員驚佢哋再郁手上前調停，冇幾耐警員就到場調查，最後兩個人涉嫌喺公眾地方打交，兩個都拉，51歲姓陳阿叔同28歲姓莊青年均有受傷送院。