華籍倉主呂健威今季成績令人驚喜，昨晚（6日）夜賽又勝出「傳奇」，已直落連贏六日，氣勢旺到不得了，威哥季尾攻勢未有放緩，目前41Win在手，差第四嘅告東尼3場，莫非今季想衝擊前四，過吓Big 4癮？
周日（10日）呂廐以六駒應戰，依然有食糊籌碼。其中，列陣第六場四班草地1800米之「金童」，最近四仗錄得一冠三位佳績，低班馬難得演出穩定，可見作戰狀態喼得好。
不過今次這匹六歲馬回升四班出擊，騎開的沈拿放手改策同場霍利時馬房「怡德」，「金童」就由有昔日馬壇神童稱號的蔡明紹接手。
今晨（7日）騎者替「金童」於雨中出試，人馬操罷返回機坪，蔡明紹落馬後隨即摸馬頭，似乎對這一課操練甚為滿意，究竟今番兩「童」相遇，會否擦出火花？