80後嘅意大利靚仔賽車手Lorenzo Bertelli，傳今年結束賽車車手生涯，回復富二代嘅真身，「轉工」去普拉達（1913，Prada）繼承家族生意，專注開拓數碼推廣業務，鋪路接班。
30歲嘅Lorenzo，2011年起成為世界房車拉力賽嘅賽車手，出戰超過50幾場賽事，過去七年嚟戰績唔算突出，未試過贏到冠軍，甚至三甲不入，但無阻呢位富二代喺賽道上追夢。
不過，大學主修哲學嘅Lorenzo亦識為未來打算，並非只顧飛車，喺2015年佢加入由家族經營、Prada嘅控股公司，為今次回歸埋下伏線。佢三年前接受訪問時漏口風，話自己可以喪玩嘅日子有期限，好快要返屋企接手家族業務。
Lorenzo嘅父母年紀不輕，Prada分別由70歲嘅Miuccia Prada同72歲嘅Patrizio Bertelli管理。Lorenzo嘅哥哥上年9月已幫手家族生意，出任數碼傳訊部主管，同其他國際奢侈品牌包括LVMH及開雲集團一樣，搶攻網絡同社交網絡廣告兼網上零售。
事實上，Prada跟LVMH同樣面臨接班人問題，今次Lorenzo決定接手家族生意，有消息人士話公司架構短期內唔會出現重大改變，外界唔駛咁擔心啦。
李華華