連日天雨路滑，揸車都真係要額外留神。好似前晚8點幾，西九龍走廊向尖沙嘴方向發生一單交通意外。有個的士司機揸住部紅的，唔知佢係唔係當的士係跑車，喺橋面行行吓突然玩起飄移上嚟，的士其後失控跣咗幾個車位後，就打橫停咗喺路中間。
原本的哥打死火燈倒車，諗住掉頭走，點知尾隨一架紅頂小巴就駛到，結果避無可避，小巴司機收唔切，車頭直撞的士左邊車身。就係咁，的哥因為腰痛要送院治理。
市民蔡先生喺附近大廈返緊工，佢話當時望落街就見到呢單意外。佢話好彩之後途經司機都收慢停車，唔係就大件事。警方指63歲姓陳的士司機同70歲姓吳小巴司機都冇飲酒，不過的哥就同阿Sir講，係閃避切線車輛失控出事喎，吓？閉路電視明明影到係佢自炒喎，當時的士附近都冇其他車。