民建聯立法會議員蔣麗芸噚日朝一早就喺立法會走廊，攞住兩幅助理提供嘅相，好激動地向記者發言，話現時反對一地兩檢嘅民主黨同公民黨，上周先搞咗大陸高鐵團，𠵱家又反對一地兩檢，明顯係「口是心非」，又話「民協就最多㗎（高鐵團）嘞，不過𠵱家民協冇人喺度（立法會）」。
元秋話助理影到呢啲相，係因為民建聯都搞唔少高鐵團，咁啱撞到白鴿黨同公民黨啲團。元秋其後又手持手機，笑住讀出唔同網民留言，話一地兩檢會影響世界和平、導致地球滅亡、宇宙毀滅、影響人類探索火星計劃，就連噚日下晝掛三號風球，都同一地兩檢有關喎。
獲阿尹贈書惡補邏輯
元秋激動後就好似好後悔咁話：「我又發火嘞，我話咗唔發火㗎，又係你哋叫我唔好發火，跟住勞氣喎」，透露連自己個妹都勸佢唔好發火，「佢話我一發火鬧人，個樣唔靚㗎！」
對於元秋嘅指控，白鴿黨尹兆堅反駁指完全無邏輯，對方連民主派究竟反對一地兩檢啲乜都搞唔清楚。
阿尹話民主派現時反對嘅係喺香港西九站進行一地兩檢，認為應改喺內地福田站進行，並唔係反對高鐵呢種交通工具，仲話要送一本《邏輯謬誤鑑識班》嘅書畀元秋，等佢惡補吓喎。
