禮拜日（10日）沙田馬場上演九草兩泥賽事，草地用C跑道角逐，天文台預測屆時會有驟雨，馬迷要留意臨場形勢。
睇番最近5月12日同一移欄賽事，雖然有「三思飛駒」（羅富全馬房）後上贏馬，不過其餘頭馬全部守前五位入直路建功。
其中，「金碧光芒」（蘇保羅馬房）、「勝利專家」及「美麗寶寶」（大摩馬房）都係放入直路帶到，具前速馬仍然要優先留意。
今戰列陣馬中，第四場「非常堅」（告東尼馬房）今季兩勝均在田C欄跑1800米所得，重返強項有力回復表現。
另外，第十一場廐侶「加州再豫」四次跑田C欄獲一冠一亞兩殿佳績，憑出色場地性能可食尾糊。
至於兩場泥地路程均為1650米，近期同程日賽頗利後追馬，如「榮冠大道」及「曾幾何時」（葉楚航馬房）均有早段留守中後位置，入直路憑後勁反先對手，故此第二場「駕喜」（李易達馬房）、第七場「貨如輪轉」（沈集成馬房）等擅跑泥地之後上馬可秤先。