愛國愛港嘅導演高志森，早排喺fb上發表對六四事件嘅睇法，話當年冇鄧小平果斷平亂，就冇今日中國繁榮，所以要為鄧「平反」，結果有網民翻佢舊賬，搵到條高志森於1989年譴責中共屠城嘅新聞片，高志森噚日立即喺facebook發文回應，成篇文十足「悔過書」咁，話對自己當年無知「感到痛心」，不過網民繼續揶揄佢，話佢風吹向邊一面吹，就倒向邊一面，認真厚面皮。
網民：知你買錯邊啦
高志森先轉發網民搵到佢譴責屠城嘅片，感嘆「很多事情只能在回頭望才能恍然大悟」，之後又賴落佔中，話佔中令佢醒覺到，「反華勢力無時無刻不在想盡一切辦法破壞中國、瓦解中國」，用「顏色革命」這狠毒招數達到目的，又話「當年看到電視新聞令我感到好痛心，今天我卻為當年的無知感到痛心」，對自己今天的我打倒昨日的我，高志森話「人會成長，病會治癒，國家可以走出谷底邁向盛世，這就是過程」。又指，「如果當日中國政府不果斷處理，野火燒遍全國就一發不可收拾，四分五裂了的中國那有今天的繁榮昌盛和充滿希望？」
網民睇見佢咁寫，自然唔放過佢，有人起底揭高志森同前妻、兩個女早在1995年已移民美國，反問佢咁愛國，為乜唔叫兩個女返大陸定居，貢獻祖國，「口x美國，日日x美國，又要去美國住係咩心態？真係唔明白喎！」亦有網民用星爺《九品芝麻官》套戲入面，星爺諷刺尚書大人，風向邊一面吹，佢就倒向邊一面揶揄高，「得啦得啦，知你買錯邊啦，可以收皮咪？」網民話佢真係夠晒無恥兼厚面皮喎。
李八方