「因乜差事跳跳跳？」近日網上廣傳一條交通警員喺土瓜灣東九龍走廊叉腰兼「扎扎跳」嘅車cam片段，6月4日下晝喺近啟德隧道往觀塘入口，一位交通警截停兩條行車線駛至嘅車輛，似乎為前面一輛私家車開路。慢線駛至嘅車及時停定，快線一輛客貨車亦收慢停車，但喺𠵱個時候交通警員突然向後彈跳兩步再一個轉身，企定後一臉無奈叉晒腰，原來尾隨客貨車嘅的士疑收掣不及撞客貨車車尾。
警截車助開路
當大家疑問交通警為乜要截停啲車嘅時候，涉事的士司機將佢嘅車cam片段放上網，睇真啲，的士衝向前面客貨車之前曾經「chok」咗一下，原來的士都係受害者，懷疑佢後面嘅藍色私家車先至係「元凶」，搞到三車串燒。
警方稱，事發時交通總部一名警員喺現場指揮交通，協助一輛私家車返回隧道入口，其間一輛駛至嘅輕型貨車依警員指示停車，尾隨嘅一輛的士及私家車懷疑收掣不及導致三車相撞。意外中，35歲嘅的士男乘客不適送院。