前日天文台發出今年首個1號波，挾住黃雨警告，但仲有巿民冒生命危險喺本港兩處石澗嬉水影相。fb專頁「山野龍咁威」上載兩輯行山人士嘅組圖，一輯有約4女1男喺全港最大石澗荃灣城門水塘嘅大城石澗挑戰急流，現場水勢洶湧，男子坐喺大石上豎起手指公影相。據專頁話，相中其中一位男子，5月底時喺北果洲划艇時翻艇，喺大海漂浮幾個鐘，最後要水警拯救，險過剃頭，點知佢未知驚，仲帶隊挑戰黃雨下嘅石澗。
另一班人就喺東涌卧龍石澗，雖然部份人戴住頭盔，但都睇到網民火都嚟，有網民留言：「下次叫佢哋簽咗生死狀先，出事唔使救！」fb版主話，兩輯相都係當事人自己擺上fb，有網民報料畀佢嘅。版主仲話，開專頁原意係因為𠵱家實在太多人罔顧安全，恃住稍有經驗就喺惡劣天氣帶隊進行危險活動，出事嘅往往就係𠵱啲所謂老手，藉此專頁警惕大家一下。