利物浦門將卡利奧斯可以話事業情場兩失意，喺歐聯決賽犯下兩次致命失誤令球隊輸波後，周三更爆出同女友伊安分手，認真慘情。據英國《每日星報》報道，伊安已喺社交網站更改自己嘅感情狀態為單身，相信佢兩人嘅分手同球迷嘅恐嚇同埋騷擾有關。
講開卡利奧斯，美國有醫生證實佢喺對皇馬嘅決賽曾受到腦震盪，或會影響佢嘅表現。而對於呢個說法，車路士門將泰拔高圖爾斯就覺得相當奇怪。高圖爾斯亦曾經試過腦震盪，佢話腦震盪後會令佢睇唔到個波，令佢要退下火線。所以佢好難相信卡利奧斯喺受到腦震盪後，仍可踢完全場。同時被指撞親卡利奧斯個頭嘅皇馬中堅拉莫斯，就喺周二發表惹火言論：「卡利奧斯因同我碰撞至有腦震盪？𠵱家我等緊法明奴同我講，因為我嘅汗滴落佢身上而令佢感冒。」之後佢仲話，沙拿如果喺下半場打止痛針，其實可以繼續踢。