塞爾維亞周一喺首場世盃熱身賽落筆打三更，喺奧地利以0:1不敵無緣出戰今夏決賽周嘅智利。塞爾維亞今場收起咗尼曼查馬迪同米連高域沙域，利物浦中場、上季外借到卡迪夫城嘅馬高古積就打正選；智利今場亦冇阿歷斯山齊士同維達爾，但呢支南美球隊仍然靠馬利賓喺完場前兩分鐘嘅入波，以1:0小勝塞爾維亞。不過今場「亮點」係前紅魔前鋒、家陣踢緊墨超阿特拿斯嘅安祖路軒歷基斯（箭嘴示、小圖），佢喺75分鐘一次miss都算世界級。當時佢接應隊友右路地波傳中，喺離門三碼仲對住空門下，竟然直接射咗出界。其實軒歷基斯雖然「效力」過曼聯三季，但就未上過陣，曾經外借到韋根同薩拉戈薩等，擺明冇料到。