網民早前興起上傳自己嘅「日本制縣等級」測試結果，即係喺日本地圖上將曾到訪嘅城市以不同行為判定分數，吸引各地網友推出唔同版本，香港版網頁原來亦已面世，「制霸」全港指日可待！
「日本制縣等級」嘅測試分數，係按照用家曾喺地圖上各日本縣市做過嘅行為區分，分數由低至高，呢啲行為分別為：沒有去過、路過、休息或轉車、遊玩過、住宿過，以及最高等級嘅居住過，將各行為等級嘅相應分數相加後，就會得出用家的「制縣等級」。
至於香港版本（圖），啱啱嘅周日由「小王子廣東話版」facebook專頁發佈，地圖以18區劃分，顯示語言可選擇香港粵文、繁體中文或英文；相比日本同台灣，香港嘅面積太小，若僅以18區劃分，就唔夠仔細，有網民建議製圖者「試下用區議會（選）區」劃分，亦有人笑言「想知有無人未去晒十八區」。