建制派芸芸眾多議員之中，數到低調嘅除咗勞聯潘兆平，金融界陳振英肯定係其中之一。雖然大家留意開財經新聞，對佢一定唔會陌生，但若果喺政治圈中，佢就相對無咁受注目。原來曾幾何時，陳振英乃係MK仔一名，分分鐘仲係第一代MK仔呀。
自小出入棺材舖
現年57歲嘅陳振英（Ronick）喺美國東北路易斯安那大學（現名為路易斯安那州門羅大學）獲工商管理碩士學位，92年加入中銀香港全資附屬公司南洋商業銀行，服務中銀廿幾年。貴為議員，現時又係中銀（香港）嘅顧問，其實佢出身同好多人一樣，都係普通市民，細細個就住喺今日嘅旺角玩具街，真係名副其實MK仔。
Ronick仲記得當其時住嗰啲冇𨋢嘅舊樓，仲要住9樓喎，每日返學、放學都要撐足咁多層樓梯，嗰陣時屋企仲係用緊石油氣，每次叫石油氣，都會俾送石油氣啲師傅話：點解要叫罐大嘅？雖然住得高出入係辛苦啲，但都有好多開心嘅回憶，譬如大廈天台就係佢同其他小朋友嘅遊樂場，連踩單車都係喺嗰度學識嘅。
相信因為喺旺角大嘅緣故，Ronick真係天不怕、地不怕。舊時嘅旺角有好多小販，賣各式各樣嘅食物，Ronick話，佢真係咩都試過，當然今時今日睇番，好多人都可能嫌無牌小販唔衞生，不過嗰個年代十分普遍，亦係唔少窮人恩物。除咗唔怕污糟，Ronick仲話，可能因為近住廣華醫院，當年旺角有唔少棺材舖，佢就有個同學嘅屋企人係做呢行，故此由細到大都喺棺材舖出入，令佢對棺材一啲都唔驚。