爆相爆片：廿米水管墮地　水舞停車場

打機玩「接水管」玩得多，跌水管你又見過未？東涌屋苑昇薈嘅停車場最近就發生咗一宗離奇跌水管事件，搞到啲水柱係咁噴，成個停車場變咗「水禾田」，住客見到都話：好誇張！

影響屋苑供水

件事就係上月29日朝早11點幾發生，好多住客事後都報料，昇薈地下停車場一段廿米長嘅L形水管，無啦啦喺天花跌咗落嚟。斷喉就梗係爆水啦，咁啱個噴水口面向牆壁，水柱源源不絕咁喺管道激射而出，最終搞到成個停車場水浸囉。
好彩停車場坑渠無瘀塞，去水去得算快，加上漏出嘅係食水，泊喺車位嘅私家車只係浸濕咗個轆，如果係鹹水就弊。不過事後水務署要派水車到場增援，安排受影響屋苑居民攞水食用，部份單位要到第二日先恢復正常供水，居民都話好唔方便。
住客陳小姐就話，早前已經有住客發現冧落嚟嘅水管有少少鬆脫，估唔到會連喉碼甩埋，成段跌落嚟，好彩無扑中人或者車，如果中頭獎肯定非死即傷。佢質疑昇薈只係喺2016年3月入伙，唔夠3年，點會咁快成段喉管甩脫，希望發展商同管理公司檢討維修保養質素喎。