有人搞「香港特色」講談。
在六月的哀傷中，六四維園燭光，排第一。
漂移的港珠澳橋，特色一個危字。睇住一張照片講唔晒的弱波石隨水漂浮，學政府篤數，香港多條橋，厲害了多少？
識條鐵的馬主席話OK，沙中線即PK，二萬六粒螺絲頭有幾多唔合規格？港鐵滲水，豆腐渣怵目驚心，乘客坐車時全程祈禱，成為香港特異絕色。
機場三跑附近水域不斷發現豚屍，不是海洋公園騷，未成年豚屍是真實殘酷的香港大白象特色。
乾到龜裂的水塘，此景只應地上有，大便論繼續造勢，水塘成為點心紙選項。東江水唔夠的話可以搵大灣區放水，香港水塘起晒樓佢，土地問題，一天光晒。抽水，從來係香港特色。
香港特色唔能夠唔提選舉主任的DQ大權，一句唔信納就落閘。邊個可以落選舉主任閘呀？問馬髮膠，佢肯定識主任個老細。至於公僕被差遣做立會狗仔隊，教科書唔准寫「中國收返香港」，透視出香港未來的專屬色：灰，溝極唔淡的陰霾灰。