賀賢剛周日（3日）憑「馬到成功」取得季內第14場頭馬，由於同時累積獎金已逾1,850萬元，故毋須贏夠16Win，亦符合馬會續牌標準。賀賢雖已達標，但他表示早前搏殺手風太差，多次跑得亞軍，希望趁季尾手風轉好，把握機會多取頭馬追數。
今期(6日)快活谷賽事，賀賢派出三駒上陣。第八場三班1650米的「幸運時代」是賀賢的追數希望，上場在賀廐見習生潘明輝胯下開齋，由於「火車潘」正值停賽，此馬今場改配另一見習生黃皓楠。
賀賢說：「『幸運時代』近期狀態勇銳，表現非常穩定，前仗四班谷草一哩已得第二；上次升上三班面對較強對手，但仍可在谷草一哩克服11檔障礙，一放到底輕勝，足見牠進步甚大。『幸運時代』今場再出，我book定另一位見習生黃皓楠，希望減磅有利。此駒上場贏得都幾出色，論馬目前狀態仍當銳，今場負119磅仍算輕，排2檔更遠勝上仗11檔，我梗係對牠有一定信心。」