上星期五（1日）「牛肉乾」先啱啱加價，唔知係咪加25%太多令到好多司機接受唔到，估唔到短短幾日間就有市民因為抄牌問題，同警員發生咗拗撬。
喺前日（4日）晏晝大概一點，有個客貨Van司機喺深水埗福華街黃金電腦商場對出禁區，懷疑違例停車，其間阿Sir想抄佢牌，有人就好勞氣，現場仲有人大嗌「差人打人」；結果驚動到3、4部警車到場增援，差唔多13個警員仲一度揸晒警棍長電筒㖭，認真大陣仗。
王先生經過現場拍咗片，佢話事發時架客貨車喺禁區停車，司機見到有警員就駛走部車，但客貨車行到路中心，就俾阿Sir截停，之後就發生拗撬。王先生話喎，聽到阿Sir叫個客貨車司機將架車泊埋一邊，泊番好先，點知個司機就好激動咁同警員講：「係你叫我停車㗎，𠵱家又話泊番好先，我有車Cam影到晒㗎，現場咁多人都可以做證㗎！」
片段見到個司機大聲同阿Sir講：「我違咩法呀，我揸緊車㗎，違法！」佢話阿Sir唔可以抄佢牌，要Call律師嚟，仲話：「我唔係做運輸㗎大佬，乜嘢唔走呀，我開緊車㗎阿Sir，你講乜嘢呀！」
4部警車增援
王先生話見到兩個警員想捉住個司機，但司機揈開咗佢哋隻手，仲一度有人大嗌：「差人打人呀！」其後有警員Call上台嗌增援，唔使5分鐘就有3、4部警車到場，差唔多13個警員落車，仲揸晒警棍長電筒，當發現對方得一個人，先收番埋啲警棍。
警方就話事件中，深水埗分區人員巡經福華街時，發現涉事輕型貨車違例泊車阻塞交通，於是向39歲姓吳男司機發出定額罰款通知書。司機經勸喻後回復平靜，自行離開，警方冇拉任何人。