水務署都有廣告提示雨季來臨，呼籲巿民唔好進入集水區玩水，一旦遇上暴雨，引致山洪爆發，好易出事。不過總係有人唔聽話。居住廣源邨嘅張先生適逢上周末（2日）沿小瀝源行山，目睹數名男子帶同男童，喺花心坑集水區內游水，游得不亦樂乎。
張先生話，集水區對開已豎警告牌，講明唔准玩水，否則判處罰款，而且嗰度集水區除收集雨水，仲會畀附近村民飲用，批評班人：「貪唔使錢入集水區污染食水，嗰度成米七水深，真係好危險！」
去年7月有兩名行山客進入大嶼山二澳水澇漕集水區嬉水，違反《水務設施條例》，結果被判各罰款500元，所以大家千祈唔好以身試法呀！