深水埗一間樂器舖最近發生咗單店舖盜竊，賊仔嘅手法不做作，但可惜掛住望地，唔為意有天眼影晒過程。天眼片段影到呢位仁兄，喺上個月27日傍晚約6點半，入到福華街一間樂器舖。只見佢眼明手快，見四周無人，立即彎腰對準目標結他，扭呀扭，扭咗一粒拾音器切換掣出嚟，拎住粒掣先行兩步，見冇人發現就順手放入褲袋，全程都唔夠半分鐘。
店主：零件便宜但難訂
舖頭負責人程先生話，被偷走嘅係電結他拾音器切換掣，事隔幾日後有客人問起，先發現隻結他冇咗粒切換掣，咁先揭發事件。程先生解釋，事發時佢喺貨倉做緊嘢，店面嘅職員亦留意唔到所有角落，結果被人有機可乘。
程先生又話，被偷嘅零件只值幾十蚊，但市面上好少地方有得賣，訂貨嘅數量太少亦無人接單，如果搵唔到零件，兩支總值近5千蚊嘅電結他就要平賣，甚至賣唔出。由於涉及金額唔大，程先生話無打算報警，但呼籲偷零件果位仁兄可以歸還，唔打算追究。不過經一事，長一智，程先生決定喺舖頭嘅死角位都加上閉路電視監察。