話說肥通近幾日返深圳睇手機生產線，想不到明明睇Android機生產，但竟然收到新iPhone料喎！都啱嘅，知己知彼百戰不殆。
每年9月都有新iPhone發佈，舊年一次過推兩部，曾成一時盛事；可能舊年氣氛真係太好，有傳今年Apple會加推至3部新機！
呢三部機據稱有大、中、細不同尺寸屏幕，明顯想打晒上、中、下三路消費者！先講細機，據行內人稱，機身會貼近i5尺寸，但屏幕會使用時下流後的特高「屏佔比」及超幼邊框設計，不過手機主鏡頭會使用「單鏡頭」款色，估計主力打平價手機路線。
至於「中機」與「大機」，據稱外形設計會依據現在的iPhone X為設計藍圖，而且手機主鏡頭，會使用雙鏡頭設計；不過最開心之處，是「中機」屏幕尺寸，大概為現在iPhone X的比例；至於「大機」屏幕可能會更上一層樓，相當於iPhone X出「Plus」版，如果你現在不滿於iPhone X屏幕有點細，大家終於可以換部更大的手機了。
價錢又如何？雖然iPhone X一直被人喻為成萬蚊的手機，不過實際機價是64GB/$8,588、256GB/$9,888；據稱嚟緊將要發佈的新iPhone，機價應順理成章地突破一萬大關，不過都有開心位，就是盛傳會有雙SIM設計，好似話是為了迎合大陸市場。
以上小道消息有幾真？老實講，新機未出前就一向謠言滿天飛，不過個廠家話見過新iPhone的零碎部件，咁我就姑且寫出嚟同大家分享吓。
記者：朱崇德