救人一命，勝造七級浮屠。近日facebook流傳一段消防車疑似被停車場閘門擋路嘅片，有霸氣消防員突然雙手出擊，將閘門拆去，以便消防車進入。拍片人唔止無埋怨，仲讚賞消防員「呢啲先係做嘢㗎」。
樓主以「火速救兵 VS 安定閘口」為題，現場據知係屯門安定邨，停車場閘門出名係「蠱惑的閘」，成日拍八達通都無反應，又試過「俾人衝甩過兩次」，但係「轉頭就裝返上去」。樓主話當日消防去到閘前，搞咗一輪都開唔到閘，先至逼「霸氣消防員」出手拆走道閘，最終消除「路障」後，4架消防車暢通無阻咁進入屋苑救援。
樓主話喎，拍片人連聲大嗌消防好嘢、做到嘢。其實道閘成日都short short哋，唔畀車過，消防咁做，都算係「為民除害」啩？