年輕人唔想知唔想理嘅時候，唔少成年人選擇唔可以忘記。工黨立法會議員張超雄噚日趁六四，喺facebook貼張咗紙張都發晒黃嘅舊剪報，到底乜嘢事令佢咁感觸，回想仍歷歷在目？原來係有關1989年同1990年，佢喺美國抗議中共暴政嘅報道。
「沒忘記死難者呼喊」
89年《中國晨報》報道，大字標題「聲討中共偽慶餐會華埠昨晚怒吼『只有國殤』」，其中有張相，相中人拎住紙牌「人民肝腦塗地，你吃得下嗎？」，嗰撇鬍鬚同眼鏡，一睇就知係張超雄。90年《世界日報》一段「要求中共釋放獄中民運人士」嘅報道，附圖又見張超雄，佢今次係高舉「釋放王希哲」。
29年後，現為立法會議員嘅張超雄，扮相同當年無乜分別，堅持到底嘅鬥志亦冇隨時日而變。佢無忘記初心，依舊不想回憶、未敢忘記，貼完陳年報道後留言，「我沒有忘記那些死難者的呼喊，沒有忘記家屬的悲痛，沒有忘記殺人政權的專政」，其實都係呼籲市民同佢一齊喺噚晚，再喺維園點起燭光，高呼「平反六四」、「結束一黨專政」。