習近平親自批示資助香港科技研究項目，於是內地有關機構火急行動，先推二千二百萬元人民幣畀香港22間國家級實驗室，每間得一百萬元人民幣，姿態就做到足嘞，將來如何呢？
碰到一位大教授，問佢筆錢如何用，大教授嘅答案令左丁山意想不到，佢話：「暫時封存一百萬元人民幣，唔敢用住。」乜咁保守呀？大授教話：「你有所不知，我地攞香港特區政府RGC（研究資助局）撥款，數目雖然唔夠多，但有規有矩，知道筆錢怎麼用，如何用，點樣入賬，RGC會幾時走嚟核數防止亂用一通，於是大家唔怕出亂子。但北京調錢落嚟，還未交代問責問題，用錢程序未明，不知向誰人負責，總之一切管控中央公帑研究費嘅程序與指引都未有，我地收到筆錢，點敢用住呀，擺入夾萬先啦！」
咁鬼保守，行使酌情權得唔得？大教授話咪講笑，香港有ICAC，內地有嚴打貪腐，一旦用錢出了問題，搵邊個負責噃，不過佢都認為中央有意組織香港科研力量與內地合作，將來研究資助一定有持續性，數目會逐漸增加嘅。但內地有關當局（譬如財政部、教育部）要訂下一套有規可循嘅資助方案先至得㗎，香港RGC有辦畀北京睇嘅啫！
習近平最近向中國科學院、工程院聯合院士大會發表開幕演說，唔知係唔係端午節將至，引用屈原「離騷」兩句：「亦余心之善向兮，雖九死其猶未悔」，可見其心意之決，所謂「余心之善向兮」，當然就係指科技救國，中國要有自創關鍵核心技術不靠外國貨，為達此目標，即使九死一生亦不後悔，務必全力向前。習近平講到咁咬牙切齒，當然係見到中興被美國禁制之後，立即進入休克狀態，生產停頓，損失慘重，以前聲稱追上世界水平嘅科技企業可以威脅Cisco，原來不堪一擊。為此，習近平與特朗普通電話，放下身段要求特朗普放生中興，放生嘅代價係向美國繳交罰款13億美元，董事局管理層全面改組，以後要行為謹慎，合乎美國要求，習近平私底下一定認為非常沒面子，故此強調「關鍵核心技術是要不來，買不來，討不來的。」相信以後中國科技專家學者會得到不少金錢及政策優惠，順便益埋香港科工學者。話係咁樣講嘞，如何做得到，與中國體制有關咯！