雷神莫雷拉與潘頓冠軍之爭已呈白熱化，兩人不單在綠茵場上鬥一番，而且更爆發口水戰，其中潘頓更暗指雷神認輸只係「扮可憐博同情」，從這方面睇，兩位猛將對今屆冠軍寶座都好在意。
既然各不相讓，趁周三（6日）快活谷夜戰，雷神開始停賽兩期，潘頓當然唔會錯過追趕對手嘅機會，並且book定成手實力馬應戰，準備盡情數糊，當中更包括上仗由莫雷拉勝出、徐雨石馬房的「皇仁先鋒」。
「皇仁先鋒」之前一直表現平平，直至上仗輕勝谷中1000米，四歲馬來到季尾有開竅跡象，相信仍有唔少進步空間。
今次「皇仁先鋒」再爭勝途，刻下鬥志如虹、爭冠軍雄心熾熱嘅潘頓挑通眼眉，乘莫雷拉停賽自然老實不客氣，立即取得策騎權，並在昨晨周六朝（2日）過檔操一課，做足備戰工夫。
翻查數據，徐雨石今季同潘頓合作13次，取得4冠1亞4季，上名率近7成之高，石哥當然樂於將「皇仁先鋒」換上潘頓，起碼在配搭上並無削弱，有助馬匹爭取連捷。