香港學生及家長最識睇風頭火勢，現在DSE考試完了，下個月就會放榜，有邊一個學科嘅畢業生最易搵工呀？話畀大家聽，二十年風水輪流轉，成績好嘅學生唔好相信甚麼環球商業嘞，報讀番電腦工程，電機電子工程、資訊工程、自動化機械工程呢類，四年後出路會多好多。銀行會請，初創企業、科技工業會請，夾埋幾個師兄弟開初創公司亦得；讀商科已經落後於形勢。工程學位再加一個MBA先至係在工商銀行界向上爬嘅帶路明燈，將來所有公司嘅人員，唔識電腦、數碼嘅話，一定上唔到CEO呢個位；新工程（即非土木、建造、結構、舊式機械工程）學位加CFA，又係進入資產管理界做「芬佬」嘅最佳保證，真係想做ibank嘅，與其讀環球商業，不如主修IT副修經濟/金融。
肥仔K在科學園一家初創企業做兼職日本市場顧問，主打日本電子遊戲公司，今個星期又去咗東京拜訪兩三間玩具/遊戲行業大公司及到東京玩具展交流。佢間公司嘅創辦人就係在史丹福讀新工程嘅香港學生，畢業後加入華爾街大行做iBanker，做咗三年，攞得花紅就辭職出來創立「醒目晶片」公司，由一位史丹福同學（電腦科技教授）做科技顧問。所以話，在大學讀科技，進可攻，退可守也。肥仔K話在科學園返工，原來有標準工時，因為科學園規定下午六時熄冷氣機，各初創公司辦公室熱到跳舞（34度、冇冷氣、開唔到窗），如要申請額外冷氣時間，每小時200元，故此絕大部份公司在六點放工，係整個香港少有現象，政府如不立法規定標準工時，大可在全港執行下午六時寫字樓熄冷氣政策！林鄭特首成日話推動香港成為科技創新之城，如科學園者，在羅范椒芬領導下，就趕科學園公司準時放工！初創公司老闆話班90後僱員好喜歡晚上搏殺搞創意嘅，現在唯有叫佢地快啲食晚飯回家做Home office。幾星期前未夠六點半，在馬會銀袋咖啡室已經見到教授W與W公子食完飯埋單，問W教授點解咁快呀，佢話兒子在科學園一間企業工作，六點一定放工，擒擒青來銀袋吃晚飯，七點返到屋企就打開電腦進入公司內聯網，繼續工作，咁即係搵W教授嘅冷氣費嚟津貼科學園企業，呢條真係科學園絕橋也。