陳庭欣(Toby)近日被指做第三者，狠撇「有米大狀」唐偉倫（Warren），戀上身家億聲億嘅彩豐行老闆楊振源（Benny）。據聞陳庭欣whatsapp完Warren講分手後3日，Benny就喺fb向Toby發表愛的宣言，仲將感情狀況改為「戀愛中」。而Benny本身亦有正印劉依靜，陳庭欣有當小三之嫌，四角關係好複雜。
陳庭欣昨日喺灣仔出席《宮心計2深宮計》活動，陳庭欣明顯有備自來，直指雜誌屈佢食死貓，佢話：「超越我底線，死貓食得多對身體唔好。」佢話過去嘅感情事有好好畫上句號，知道佢嘅感情來龍去脈只有三位圈外好友，暗笑話：「唔知點解佢連我幾月幾號做過乜都咁清楚，仲清楚過我。」
陳庭欣坦言與Warren關係維持兩年，並暗示有人太依賴，終至分手。佢話：「我點解唔揸頸就命呢？但我真係做唔到，可惜我唔可以小鳥依人，24小時陪住對方，個性又太倔。(驚唔驚被指拜金？)我都識好多唔同界別嘅朋友，緣份講唔埋。」
陳庭欣直認與Benny交往中，現在相處得好開心，但對方唔想公開。問到識唔識Benny前女友劉依靜？佢話：「唔識，每個人都有過去，唔需要去check，總之大家都係單身再開始。」陳庭欣表示都係睇到Benny嘅愛的宣言，先開始了解對方，佢話：「當時我係分咗手，處於唔開心日子，見到呢個緣份出現開始去了解。」
Benny喺文中話視對方為結婚對象，問陳庭欣係咪都一樣？佢話：「我唔諗咁遠。」佢直言今次事件令佢同Benny都得好困擾，現在同對方拍拖數月，對方講乜都會信。問使唔使試用期？佢話：「工作先有，感情唔係一個掣，一按stop就玩完。」對於被指係公屋港姐，佢似乎好介意：「「社會上好多人住公屋，係社會問題，唔需要用來做文章，目標係買樓，希望兩年內成事。」