英格蘭想喺今屆世盃踢出好成績，真係要靠晒新任隊長哈利卡尼喇！事關呢位效力熱刺嘅王牌射手，今場繼續「單天保至尊」，射入咗佢代表英軍近七場嘅第八粒，幫球隊半場領先兩球；點知三獅兵團下半場踢到走晒樣，好彩最尾都守得住2:1勝局，總算為出征世盃有個好開始喇！
熱身賽大家最關心嘅或者唔係賽果，而係英軍用咗乜戰術同用乜人孭飛。領隊修夫基今場就繼續試練三中堅陣式，門將方面揀咗比克福特，右閘基爾獲加移入中路夥拍老將加利卡希爾同史東斯，艾舒利楊格同捷比亞分列左右翼衞，前線就由連格、史達寧、迪利阿里，配合隊長哈利卡尼爭取入波。
臨完半場勁射得手
開波前，兩隊都為前英格蘭名宿韋健士四月離世，進行咗簡單嘅悼念儀式。三獅兵團今仗揀咗尼日利亞嚟練兵，明顯為咗世盃分組賽對手、同樣嚟自非洲嘅突尼西亞作預演，所以英兵一開波就踢得好鬼積極，傳送極為爽朗快速，仲喺開賽七分鐘就由加利卡希爾接應角球破網開紀錄；踢到39分鐘，英軍隊長哈利卡尼禁區頂起腳，對手19歲嘅門將烏蘇奴擋唔住卡尼嘅勁射，個波喺佢嘅腋下入網，令三獅半場就贏兩粒。
正當球迷見到英軍朝氣勃勃、滿有希望之際，對手超霸鷹下半場連換四人，隊波亦即刻醒晒，先由伊禾比追成1:2，之後仲一度撳住英格蘭嚟打，好彩英軍最終都守住勝局。賽後領隊修夫基就話滿意英軍今日嘅表現，入波係由球員之間良好嘅配合產生，但就對失咗一球嘅防線唔係咁滿意囉！
史達寧插水被鬧爆
另一位令球迷不滿嘅英軍球員，就係近日因為腳上有槍枝紋身、鬧得滿城風雨嘅翼鋒史達寧，事關佢喺下半場52分鐘因插水食黃牌，被網民鬧爆：「踢友賽都要插水，真喺影衰晒球隊囉！」而對手超霸鷹場內雖然輸波，但場外賣波衫佢哋就贏晒，事關今年佢哋嘅戰衣非常搶眼，螢光綠同黑白色嘅V形羽毛花紋設計，勁有非洲風格，仲成為咗潮物，全球已經有超過300萬件訂單㖭！
