爆相爆片：
怪漢瞓馬路　懶理車轆擦身過

星期六朝早大部份人都充滿睡意，葵涌有一個中年漢可能見攰，居然坐喺馬路中間，之後仲瞓埋喺地，其他車見到都要即刻扭軚駛去對面線閃避，搞到交通擠塞，以一人之力影響世界。

讀者陳先生上周六朝早8點幾喺葵涌光輝圍禾葵里一個巴士站外，見一個中年漢左手撐地坐喺路中心，巴士、小巴經過都買佢怕，搵路避開佢，唔少車仲要逆線避開中年漢。但中年漢無動於衷，後來仲攤開隻手橫瞓路上，後來一架巴士怕撞到佢，惟有停車令現場交通出現擠塞。而香港人亦充份展示包容，完全冇理呢位中年漢，過路嘅過路，揸車嘅揸車。
陳先生話呢位身穿螢光綠上衣嘅中年漢不時眈天望地，又向經過嘅車同人手指指、口噏噏，似乎神志不清。中年漢瞓地一輪後，最後休息完就向荃灣方向閃人。