「有人侵犯我！」嘩嘩嘩！唔通7仔有色魔？阿姐，冷靜啲慢慢講。據住喺黃大仙下邨嘅讀者安仔所講，日前朝8點左右，佢去冬菇亭隔籬7-11便利店買嘢，突然聽到有幾個人嘈交，「我叫你排隊呀！」雖然趕住返工，但安仔都忍唔住八吓，據佢講，光頭四眼黑衫男同佢老婆排隊畀錢時，同黃衫阿叔嘈起上嚟！
由安仔拍攝嘅片段睇到，黃衫阿叔手執疑似酒樽，又舉起左手，俾黑衫男一手捉住，而黑衫男嘅老婆就打電話報警，「有人侵犯我，攞起玻璃樽想扑我！」7仔阿姐即刻上前制止，黃衫阿叔亦放番低個樽。而全程企喺老婆身後嘅黑衫男，把口一直冇停過，「狗頭」、「睇路呀」、「冇仔送終呀！狗雜種！」
由於正值返工返學時間，便利店內有唔少小學生，俾呢3個大人嚇到走夾唔唞，亦有學生睇到唔捨得走，唔知係咪想理解黑衫阿叔話中含意呢？安仔認為，黑衫男嘅用詞十分過份，亦唔應該當住咁多細路面前郁手郁腳，「鬧人冇仔送終，街坊街里使唔使咁鬧？」
警方話，當日上晝8點左右接報，有兩名分別39歲同65歲嘅男子，喺便利店因為排隊問題爭執，事件中無人受傷，警員將案件列作糾紛處理。