新亞師弟姚濬康是1999年電腦工程系校友，嗰陣時全世界有科網狂熱，理科生考得成績好嘅，個個想讀電腦有關科目，高考成績冇一兩枝火箭，休想申請入讀。點知2000年科網股爆破，科技人頓失所依，不少人被迫轉行，左丁山一位親戚係資訊工程學士，在大公司做晶片設計，亦吃了無情雞，轉行做游泳教練，真是命運弄人。之後呢，個個理科叻仔叻女都話要讀環球商業（有志做醫生者例外）。IT電腦無人問津，於是呢幾年無論邊間大學，讀電腦科技嘅學生，只要考到DSE 20分以上就可放心申請，同二十年前差天共地。
姚師弟畢業後碰上高潮，隨即爆破，於是變身成為利用電腦做設計嘅設計師，憑轉身快與不斷學習，在設計及活動管理（Events Management）方面站穩陣腳，有自己公司，幾年前夠醒目，加入新亞校友會，努力為擴展校友網絡，識咗不少老中青校友，令佢受益良多，適逢班老鬼推動校友會理事年輕化，找九十年代、千禧年代校友接棒，見到姚師弟做事夠落力，於是推選咗佢做校友會主席。本來左丁山與佢畢業年份相差28年，邊會相識吖！如果唔係校友會，大家會碰面不知你是誰。
姚師弟呢日有事上中環，搵左丁山吃午飯，話成世仔未去過陸羽，想試吓，咁就容易啦，於是同佢去陸羽飲茶，順便講吓2019年新亞70周年校慶晚宴之籌備事宜，請佢推動近20年畢業嘅校友參加。姚師弟話義不容辭，佢話一年以來佢刻意增加校友交流，每個月舉行一次校友Happy Hour，在中環、銅鑼灣、太古坊搵酒吧或者餐廳舉行，甚受年輕校友歡迎，剛於5月31日在糖廠街Mr & Mrs Fox舉行咗一次，有近50名年輕校友參加，其中有不少係中文大學新書院（即善衡、晨興、敬文、和聲、伍宜孫）校友，因還未有書院校友會活動，亦聞風而至，目的係識多啲校友。現時中文大學學生眾多，不少畢業生在中環碰頭，亦不知對方係同期同學，有幾次要由多事公左丁山介紹崇基生與聯合生認識。其實中文大學學生不比港大學生咁富裕，多出身公屋，讀本地學校，家庭背景與港大生有相當差距，出到商界打工識人少，不時輸在起跑線，一定要擴闊社會網絡；第一步就係參加中大書院嘅校友會活動，與不同年份、不同系別嘅校友交流，互相提點，希望一齊向上流動，左丁山幾十年前就明白呢個道理，結果得益良多，可惜現在還有不少畢業生不懂，對校友會活動不聞不問！