華將梁家俊近日晨課轉趨活躍，經常一早到場。除了接柯打操馬外，又趁空檔時間，穿梭多位相熟練馬師之間，睇動靜明顯較前積極得多，估計季尾餘下個多月賽期，吼實佢嘅座騎，相信會有收穫。
其中梁家俊今早(2日)便和蘇保羅有晒搏殺手影，兩人孖公仔般，一齊吼實「利之喜」出操前後的情況，非常緊張，期間他們不時低頭細語，有商有量，反映對此駒高度重視。
蘇保羅旗下的「利之喜」，將於周日(3日)第一場四班1400米配梁家俊出擊，看這對騎練的動態，今仗擺明是此駒目標所在。這匹3歲馬曾爆145倍大冷位置得季軍，可見有一定質素，而梁家俊正值爭奪「告東尼獎」的關鍵時刻，剛周三泥地夜馬，他四度入Ｑ不勝，維持31Win只領先潘明輝兩場，所以家俊仔現階段唔心急贏馬就假咯。