咦，啱啱先到6月，咁快有新iPhone出咩？No！呢班大叔大媽只係排隊等「鳩嗚」。等得攰就踎吓先，踎到餓餓哋，就剝隻雞蛋頂肚先！「鳩嗚團」變身咗做野餐團！邊度咁正？等九龍城嘅讀者陳小姐話你知！陳小姐喺九龍城啟德道開地產舖接近10年，佢同小記訴苦，話年幾前私人住宅御豪門商場，開始有大陸旅行團嚟「鳩嗚」，每次都有近百人，未入到商場嘅就喺商場外曬住等，高峯期係每日上晝11點至下晝1點，人多到霸住成條行人路，逼到附近嘅居民出入都要行馬路！
陳小姐最嬲嘅係班同胞企晒喺舖頭門口，由於佢舖頭出面有個石壆位，夠坐幾個人，結果日日都有一大堆人企喺門口之餘，仲坐埋喺度，舖頭嘅落地玻璃都俾呢幅人牆圍到蚊都飛唔入，嚴重影響生意。
附近店主日洗6次地
做唔到生意都不特止，陳小姐仲要做埋清潔工，一日洗5、6次地，因為班同胞會邊等邊開餐，「雞蛋殼、蘋果芯、竹籤，乜都有，曱甴螞蟻都走晒入嚟！」雖然佢已經喺貼紙提醒啲人唔好隨地掉垃圾，但都冇用，由於舖頭外面係公眾地方，陳小姐都唔知可以向邊度投訴，十分無奈。
