5月25日黃昏，坐地鐵去旺角，再由旺角站步行去豉油街2號希爾頓花園酒店參加陳志新校友之「感謝宴」，陳志新得中大榮譽院士銜，陳要多謝一班校友多年來支持指導，特別在新亞校董會主席梁英偉校友名下嘅酒店「鷹巢」（中菜廳）設宴，左丁山本來逢星期五要湊孫，帶佢哋去馬會Playroom嘅，好少出席飯局，不過今次唔去點得呀，梗係要出席啦。
地鐵上多數撞到熟人，今次也不例外，投資C居然唔坐司機揸嘅平治，同普羅大眾逼地鐵，原因當然係過紅隧塞車麻煩，佢去尖沙嘴洲際食法國餐，坐地鐵一定唔會遲到。佢突然問左丁山：「喂，你識得咁多人，有冇辦法同我買一隻勞力士金錶Oyster Perpetual，送畀老竇作父親節禮物！」嘩，幾孝順噃，買股票賺好多呀？投資C話：「前星期我在高位出貨，確係賺得幾爽，咪冧吓老竇囉！點知去買勞力士，居然買唔到，你得閒就幫我問吓，唔該晒！」於是WhatsApp珠寶L，珠寶L即覆：「無貨，全行賣晒，公價26萬幾，一定冇折扣，你有時間就排隊等！」嘩，乜咁巴閉呀，強國人掃貨呀？同投資C拜拜之後，到旺角落車，唔抵得，在彌敦道行吓……嗰隻錶真係冇噃。於是打電話畀珠寶L問清楚，珠寶L話：「我話冇就冇啦，現在高價鐘錶市場全面復甦，勞力士金錶最好賣，係皇帝女。最高價嘅P牌珠寶錶，百幾至二百萬一隻嘅，來貨一到就有人搶住要。」乜唔係中國打貪之後，高價錶已經少人問津咩？珠寶L話：「左丁山你落後於形勢了，習主席打貪五年，舊嘅貪官已差不多肅清，連吳小暉都要坐監，肖建華失聯，即係話江山代有才人出，舊的去了，被沒收了，新一代富豪就會湧現，新的需求已經爆發了！阿左你明白未？」明晒，正是一雞死一雞鳴，就係咁嘅意思。亞洲勝在人多，民族性歷久常新，菲律賓沒有了馬可斯夫人，就出現咗一位馬來西亞納吉布夫人，馬夫人擁有名貴高跟鞋過千對，但論到總值，一定唔夠納夫人嘅百幾隻愛馬仕貝堅手袋啦，呢隻手袋，有時有錢都買唔到㗎，納吉布話家中名物唔係貪污，而係朋友送嘅，答案真係可圈可點，你係總理就有人送愛馬仕手袋畀你太太啫，睇吓依家仲有冇人送？亞洲不愧係歐洲名牌產品天堂，亞洲國家無論大小，總有超級富戶出現，總係送禮成風，買LVMH呢類股票，長揸有着數！