近日天氣炎熱,一位的士司機唔知係咪好似馬時亨話齋,天口熱,噚日喺黃大仙揸車小路出大路時不但冇讓車,仲喺雙線雙程行車嘅馬路上,同一架巴士並排逆線行車11秒,過程驚險。
噚日朝早10點幾,一架巴士沿黃大仙杏林街行駛,一架的士突然駛出,巴士馬上響號,但的士冇理照踩油,同巴士並排逆線行駛,其間經過埋交通燈,等到巴士埋站收油時先切返正確行車線。
巴士司機Jason話當時一車老友記,冇可能急煞車。Jason話自己揸咗5年巴士,第一次遇見咁癲嘅司機,大鬧的士司機太過份,「夾硬嚟」。多得Jason夠專業,慢慢停低巴士,全車人先避過一劫。