立法會係是非之地，民主、建制兩大陣營鬥咗廿年，尤其近幾年去到差唔多逢係對家提出就反對、自己友提出就贊成嘅地步。好似立法會噚日辯論經民聯林健鋒提出嘅「共建大灣區」議案，兩大陣營共14位議員提出修正案，結果民主派嘅修訂一如所料全軍覆沒，但建制派提嘅修訂竟然唔係全部贏晒！原議案雖然係林健鋒提出，但佢兩位黨友盧偉國同張華峰各有修訂，盧偉國集中青年、人才嘅修訂過咗，隨後集中講金融嘅張華峰修訂就被否決。
睇番結果，張華峰喺直選組別只差1票，嗰票極可能係出席但無㩒掣嘅謝偉俊。謝偉俊同八方講佢係投支持，但唔知點解冇顯示。至於專業議政莫乃光、民主黨胡志偉同醫學界陳沛然，喺盧偉國修訂通過後撤回修訂，得專業議政梁繼昌繼續提出，而佢嘅修訂好自然又被否決。
令人奇怪嘅係，民主黨全體棄權，公民黨直頭反對，民建聯同經民聯反而贊成。究竟問題出喺邊？佢嘅修訂包括推動大灣區旅遊一體化、爭取開放更多24小時通關口岸等，唔知關唔關事？但據知因為梁繼昌無刪去原議案中有關資格互認嘅建議，故令民主派難以支持，而佢都冇特別拉票。