昔日英格蘭國家隊中場「雙特」，來季齊齊坐正。繼謝拉特之後，林柏特將會喺下季獻出第一次，出任英冠球隊打比郡領隊。打比郡啱啱衝超失敗，喺升班附加賽出局，主帥路維特之後轉投史篤城。據講打比郡一共收到20人應徵接任，最後揀咗冇擔正做主帥經驗嘅林伯，簽約三年。林柏特2017年退役後，考取咗國際足球教練嘅B級牌照，但只係喺車路士嘅青年梯隊中執教過。39歲嘅林柏特係打比郡過去三年嘅第七名領隊，要做得長似乎有啲難度。
而林伯昔日效力車路士時，同佢並肩作戰多年嘅泰利（圖），過去一季效力阿士東維拉，球會今年冇同佢續約恢復自由身，唔知林伯會唔會考慮吓搵泰利嚟打比郡再合作呢？