新亞書院校友／校董陳志新今年榮獲中文大學頒授榮譽院士銜，同時獲頒院士銜嘅有陳守仁先生、許銘先生、羅國雄先生與蕭永泰醫生。
蕭永泰醫生畢業於中大醫學院，係著名微創手術專家，畢業後一直與中大醫學院有聯繫，參與成立中大醫學院校友會，推動校友會會員捐款予醫學院。
羅國雄先生係建築界前輩，裕榮建築置業有限公司及大洲建築置業有限公司執行董事，五十年來從不間斷到地盤視察工程，係建築界一位最勤力嘅老前輩，不時慷慨捐款支持中大醫學院及中大博群計劃。
陳守仁先生有一間陳守仁學校，大把學生爭入陳守仁，因此大名鼎鼎，其實陳先生創立聯泰集團，在塞班島與關島名震一時，曾任中大逸夫書院校董，大力支持逸夫及中大發展。
許銘先生係玻璃鏡廠先驅，從無到有，白手興家，與胞兄（已故）許海一同營運之冠華鏡廠，行內無人不識，許銘先生及許氏家族多年來捐贈中大醫學院及地理與資源學系等。講起許銘先生兄長許海，勾起左丁山回憶，想當年，初入銀行，知道有一位大客戶冠華鏡廠，上司老闆屈經理經常與許氏兄弟見面，帶過左丁山與許海先生吃午飯，佢地傾貸款生意，左丁山就要用心聽，記住說話內容，一返到銀行，立即寫筆記，次日屈先生就會喝問：「山仔，冠華鏡廠份報告寫好未？」如果答未曾寫，就會食足一日貓麵！
陳志新校友就梗係熟啦，佢係低左丁山一班嘅經濟系師弟，與佢同班嘅有著名中學校長丘頌云，以及後來成為立法會議員嘅羅祥國。新亞人大都出身貧窮，當年在農圃道校園大家邊度會估到鄭海泉、徐立之、李明逵、梁英偉、王文彥、關燕萍、馮耀輝、伍清華、林榮德等等同學畢了業後會在學術界財經界咁出名吖。陳志新畢業後即加入航運界工作，後來創業成立富邦航運有限公司，艱苦經營十幾年之後就發達，一心記住經濟系恩師郭益耀博士及新亞培育之恩，十幾年前開始捐錢支持錢穆師母之「中華美德教育行動師資培訓班」，每年都在新亞舉行，參加者全是內地中學教師，又大力資助新亞之儒家文化學術活動，弘揚孔孟學說，後成為新亞校友會主席及競選成功，擔任中大校友評議會主席共六年之久，年年舉辦籌款活動支持中大，今獲母校榮譽院士銜，實至名歸。