爆相爆片：澳門劏港客黑的　火速被捕

小記噚日報道香港關氏一家，喺澳門搭黑的被恐嚇經歷，澳門治安警睇完報道即時做嘢，好快拉咗個司機，仲揭發佢原來過去一年有13宗的士違規紀錄。關太知道消息之後，都話估唔到澳門警方咁快手。

俾人拉咗嘅士司機姓崔，廿幾歲，係澳門居民。澳門治安警睇番記錄，發現佢由舊年7月至今，至少涉及13宗的士違規，包括12宗濫收車資，一宗拒載，同時揭發佢違規冇寫行車日誌。
事發於本周日，關氏夫婦帶埋孖女喺澳門搭的士前往外港碼頭期間，原本30幾蚊嘅車資，司機索價200蚊，夫婦唔肯，司機就恐嚇要「吹雞」，落車後仲俾司機鬧「死港燦」。關太強調「唔係想搞大件事」，只係當日感到生命安全受威脅，先至拍片自保。