暴動罪，五十年塵封的殖民地惡法，由689破土，引魔出棺。各被告老中青男男女女留名留姓，遺下以血肉之軀抗命的典型母語留言，是令香港人無語問蒼天的那一句：「睇住香港」。
睇住香港。句號。完。最心痛的陳述。
睇住香港？睇得？打得？容不到普通人出手，得個睇字，任由警察以延伸的手臂打到爆肛。睇住香港，傷！睇住旺角，慘！做塘邊鵝的下場，是控方提出「入埋你數」，睇住，就分到暴動罪一杯羹！
林鄭與她的2.0班子，最順口的官腔講過N次，是「我睇唔到…！」睇唔到香港沉淪，高鐵出軌是必然，睇唔到香港人要懷疑，馬主席話OK就OK！弱波石散晒，一張相睇到香港特區領導六神無主，只能口出惡言貶損：一張相睇唔到有乜代性。睇住香港機場安保人員連一支髮膠都無權回收，林鄭成頭鬈毛，佢睇唔到馬逢國有幾條毛，唔使調查啦，有權用盡，屬於蒜皮雞毛！咁睇吓銅鑼灣書店執笠後三間西環打骰的書店有乜睇頭？書中自有官商行埋！睇住香港隱形的17萬高球從業員，叻過死侍！睇住香港X習帝感召，睇住……放長雙眼，23條葉瘤已經回魂返咗嚟！沙士，還會遠嗎？