曼聯喺剛結束嘅球季四大皆空，今夏增兵勢在必行，盛傳紅魔會重金收購今屆歐聯決賽奪標功臣、皇家馬德里翼鋒加里夫巴利，不過據講領隊摩連奴嫌貴冇乜興趣，已經同高層表明唔想嘥錢簽呢位威爾斯球星。摩佬啱啱喺周三去咗奧地利睇波，佢真正目標似乎係韋斯咸前鋒，有「奧地利伊巴」之稱嘅阿拿奧杜域。
摩佬另有心水都有迹可尋，佢喺周三親身去咗因斯布魯克，睇奧地利主場迎戰今屆世盃東道主嘅熱身賽，相信佢嘅考察目標係韋斯咸前鋒阿拿奧杜域。阿拿奧杜域喺呢場波表現唔錯，喺28分鐘助攻畀舒賀夫，攻入唯一入球，1:0小勝俄羅斯。
伊巴謙莫域喺年初離開曼聯轉投洛杉磯銀河，摩佬搵「奧地利伊巴」嚟紅魔可能都係唔錯嘅選擇。阿拿奧杜域喺上年由史篤城轉投韋斯咸，全季入咗11個英超入球，不過據聞轉會費都唔平，至少要4,000萬鎊（約4.2億港元）。
盧卡古否認同摩佬不和
曼聯要增強火力，陣中主力前鋒盧卡古喺上季最後一場比賽英足盃決賽，被摩連奴批評佢錫身怕受傷影響世界盃上陣，要求唔以正選披甲，結果呢位比利時國腳只係後備入替踢咗十幾分鐘。盧卡古日前就呢件事作出回應，否認同摩連奴不和：「我當然希望可以喺每一場比賽上陣，但我喺集訓時嘅情況唔太好，我有責任話畀領隊知道，再由佢去決定排陣。我哋有為呢件事討論，但大家嘅關係依然非常之好。」