【本報訊】N年前嘅政府宣傳片，都教各位駕駛人士「駛出真功夫，方為大師傅」，尤其係一班揸搵食車嘅司機大佬，好多都爭分奪秒，結果咪搞到心浮氣躁囉！
讀者李先生5月29日(周一)晚9點幾，揸車由大角嘴往旺角方向，去到渡船街燈位嗰陣，行車燈岩岩轉咗綠燈，李生喺左邊行車線向車行，前面仲有兩架的士並排行，呢個時候，突然有架載咗客嘅的士從右方衝咗出黎，撞咗埋右邊行車線嘅的士後座車門，由於事出突然，李生都嚇到「嘩！」一聲。
被撞嘅的士後座有一名男乘客，好彩當時唔係坐喺右邊，如果唔係就大件事，佢事後仲有落車望望。而肇事嘅的士上，兩名乘客就一直呆坐車上，睇黎係嚇親。
「擺明搏懵想衝燈尾！」李生話，嗰位的士司機見到咁多車，都仲要衝燈尾，真係離晒譜，而片入面見到，的士撞埋去之前都冇煞車，「司機好似發緊夢咁！」
大角嘴呢頭一到夜晚，就有唔少人揸車唔守規矩，佢自己就曾經喺附近畀架小巴撞到車尾，點知最後警方以證據不足作結，維修費仲要李生自己畀。
警方話，當晚9點幾接報，有兩架的士喺阿皆老街與渡船街相撞，其中一架的士，姓謝司機(56歲)同一名女乘客(54歲)報稱頸痛需要送院，而另一名姓林(63歲)司機就冇受傷。