6月17號係父親節，有酒樓推出嘅父親節筵席就搞搞心思菜式，「奔波爐碌」、「家庭支柱」、「虎父無犬子」，相信唔少爸爸睇到菜名已經會心微笑。
稻香酒樓推出謝父宴，菜式「奔波爐碌」即明爐全體豬、「寶貝酥蝦仔」即上湯蝦球伊麵、「家庭支柱」即玉環瑤柱甫、「每月交素」即係雲萊炒粗齋、「快糕長大」即係美味凍糕。玩食字得嚟又唔算太夾硬，網民話餸名搞笑，甚至有人提議加餸「成功需父幹」（雞髀姑鹹酸菜炒牛歡喜）、「富二代」（腐皮卷）、「有爺生冇乸教」（炸椰汁鮮奶）等。
稻香集團企業傳訊高級經理蔡小姐回覆《蘋果》指，菜式名係業務部高級經理歐陽繼棠先生嘅構思，佢本身都係父親，喺今年諗父親節菜單嗰陣諗到，歐陽生又話其實菜名都算係表達作為人父嘅心聲，佢話爸爸係「家庭支柱」，亦係「米飯班主」，每日做到「奔波爐（勞）碌」，只係期望有日仔女「虎父無犬子」咁話喎。
