根據英國《每日郵報》報道，阿仙奴將為中場艾朗藍斯（圖）開出五年新約，但如果藍斯唔續約，就會將佢掛牌出售。艾朗藍斯𠵱家嘅合約會喺出年到期，𠵱家佢嘅周薪係11萬英鎊（約130萬港幣），但報道就冇透露藍斯嘅加薪幅度會係幾多。藍斯續唔續約將會取決於佢喺新帥艾馬利手下嘅角色，如果佢唔續約，阿仙奴就會出售呢名27歲中場，以免一年後人財兩失，傳聞幾隊英超隊都對呢位中場感興趣，想趁機低價吸納。艾朗藍斯有「死神」嘅外號，係兵工廠嘅老臣子，由2008年效力至今，亦係今年阿仙奴隊中嘅最佳球員。而教練團隊方面，艾馬利就會用番自己嘅舊部下，意味雲格年代嘅助教保特同門將教練列文都應該無得留低。